الشاشاي والجابودي والدوبيت

يتميز التراث الشعبي السوداني   وخاصة تراث  اهلنا في البادية السودانية وذلك لقدرتهم في ارتجال الشعر بدون تكلف ، حتي الأُمي منهم يجيد نظم الشعر ولكن لا يسمونه شعراً ، بعضهم يسميه (نضم) اي نظم ، وقد صنفوا هذا النضم الي الشاشاي والجابودي والدوبيت سأدرج لكم امثلة  لهذا الادب الذاخر   للدوبيت ، الشاشاي والجابودي :

الدوبيت:

الليلة الغرام أحكامو فِيْ مشّاهِن

باح أسرارو مني وكلهن فشّاهِن
بِت البي زلف غنامي ما نشاهِن
سلمن من كلاب البي الشرع وشاهن

مالك يا نعيم كتّر عليا عتابك

أسعل ربك الصايبني ما يكون صابك
جاهلاً صغير رشرش عيونو اتشابك
ودّر فكري وأصبح في شعوري متابك

بعد الشدة فوق ضهر البحدر الطافة
صرفتو المضيفة كل يوم بى لفافــة
أكان النعمة بتدوم والعمر بترافا
كم شادك على عنافي ليهـو حفافـة

الشاشاي:

قمر السبعتيـن قدلت حمـامـة
غطـت جملتن متـل الغمـامـة
محزوز جيدها فوق بانة قوامـه
مجروح ريدها وين يلقى السلامة

ساحت إيـدا في الخـد المبهرج
وعامت ديسها نام فوق المرجرج
صـورةً جهجهت قلبي المضـرج
وفـرع البانـة لعلع فينا كـربج

 

الجابودي:

قش البطانة الفاقع

برعنو أمات براقع

أنا ما بديك: دهبي اللقيتو واقع

قش البطانة الفرهد

فوق المزرقن يرعد

انا ما جافيت لكن دريبك أبعد

يا يمّة انا المزنّب

ماكلاني نار جهنّب

حليل تومي.. اللقا الخريف وقنّب

اللخدر عيش الحدب

يا القايم فوق اللدب

عاشة القشيش، لابد تبقالي سبب

http://wadageed.jeeran.com/dobaitna.htm        المصدر